Кинеската влада има намера да ја забрани употребата на неразградливи пластични производи во земјата до крајот на оваа година. Ова се наведува во заедничкиот проектен план изработен од Државниот комитет за развој и реформи и Министерството за заштита на животната средина на Народна Република Кина.
„Производството, употребата и рециклирањето на пластичен отпад што не ги исполнува стандардите доведува до нерационално трошење на енергетските ресурси, загадување на животната средина и зголемен еколошки притисок“, се вели во изготвениот документ.
Нејзините автори планираат да ја намалат употребата на пластика за домаќинство за 30% во следните пет години. Како прв чекор, до крајот на 2020 година, кинеските власти имаат намера да забранат производство и продажба во поголемите градови на пластични кеси со дебелина помала од 0,025 mm и земјоделски филм со дебелина помала од 0,01 mm, како и увозот на пластични суровини. Кинеската влада, исто така, планира да ја забрани употребата на неразградливи пластични производи во прехранбените, малопродажните и другите услужни сектори во поголемите градови низ земјата. Дополнително, до крајот на 2020 година може да бидат забранети пена пластика, памучни брисеви и некои хемикалии за домаќинствата.
Според Светската банка, во 2017 година Кина произвела 210 милиони тони отпад, вклучително и пластика за домаќинствата. До 2030 година овој волумен би можел да се зголеми на 500 милиони тони. Значителен дел од отпадот е составен од пластични стапчиња за јадење, кои се широко користени во земјава. Прашањето за потенцијален материјал за замена за традиционалниот прибор за јадење во Кина останува отворено.
Извор: ТАСС